तुला पाहता

तुला पाहता जीव वेडावतो गं तुला पाहता
सुखाचा झरा का उरी वाहतो गं तुला पाहता?

तुझे केस सोडून ते मोकळे तू मला भेटता
उन्हाळ्यातही गारवा भासतो गं तुला पाहता

तुझा सावळा रंग आहे तुझा देखणा दागिना
मधाचा मधू गोडवा लाजतो गं तुला पाहता

तुझे हासणे ओतते धूंद तारूण्य चोहीकडे
पहा मंद वारा कसा नाचतो गं तुला पाहता

तुझे ओठ सांगून जाती मुक्याने हवे ते मला
जिवाचा शहारा पुरा पेटतो गं तुला पाहता

तुझे रूप वेधून घेते मनाला खुळ्या सारखे
तुझी साथ लाभो सदा मागतो गं तुला पाहता

तुषार जोशी, नागपूर
११ मार्च २०११, २२:५०

टाळलेस कारे?

तू टाळलेस का रे
झाले उदास वारे

गाऊ नको पुन्हा तू
थंडावले निखारे

गर्दीत माणसांच्या
शोधू कुठे मला रे

माझे तुझे जमेना
ही ओढ खास का रे?

दाटून प्राण येतो
भेटून जात जा रे

तुषार जोशी, नागपूर
+९१ ९८२२२ २०३६५

नेहमीच वाटतं मला

नेहमीच वाटतं मला

तू माझ्या जवळ असावं

तू खूप खूप बोलावं

अन मी नुसतच हसावं

 

नेहमीच वाटतं मला

तू माझ्या जवळ असावं

आणि तेव्हा जवळपास

अगदी कुण्णी कुण्णी नसावं

 

नेहमीच वाटतं मला

तू माझ्या जवळ असावं

माझ्या एकटे पणानं

तुझ्या मागे लपुन बसावं

 

नेहमीच वाटतं मला

तू माझ्या जवळ असावं

माझ्या आयुष्याचं स्वप्न

मला तुझ्या डोळ्यात दिसावं

 

नेहमीच वाटतं मला

तू माझ्या जवळ असावं

तो जवळ असल्याने

माझं जगणं फुलून यावं

 

नेहमीच वाटतं मला

तू माझ्या जवळ असावं

तुला बघण्याच्या नादात

सगळं काही विसरून जावं

 

नेहमीच वाटतं मला

तू माझ्या जवळ असावं

तू असतांना डोळ्यांनी

आनंदाचं गाणं गावं

 

तुषार जोशी, नागपूर

खपली - १

तू फुंकर घातलीस आणि
चटकन खपली धरली
तुझ्या सोबत असण्याने
जखम नकळत भरली

तुझ्या काळजीने मिळाल्या
फुलांच्या पायघड्या
निर्धास्त पणे घेता आल्या
स्वप्नांच्या मोठ्या उड्या

तूच माझे औषध होतास
वेदना जायच्या सरून
तूच दिलेली जखम आता
कशी रे काढू भरून?

तुषार जोशी, नागपूर
१५ जून २०१२, ००:००
+९१ ९८२२२ २०३६५

स्तुती

"कविता मला कळत नाहीत,
तू केल्या म्हणून वाचतोय",
म्हणताना ती गोजिरवाण्या
मुलासारखा चेहरा करायचास;
आणि स्वतःच माझ्यासाठी
एक कविता ठरायचास
.
"मला कविता का नाही कळत गं?"
तुझ्या प्रश्न नेहमीचा;
पण निरागस तुझा चेहरा पाहून
तुला कविता कळत नाही
याचा विसरच पडायचा.
.
त्याच भरात तुला हट्टाने
नवी कविता ऐकवायची
.
"वा सुंदर आहे! खूपच सुंदर!"
तू म्हटल्यावर मी विचारायचं
"आवडली? कळली कविता?"
.
तू म्हणायचंस
"हॅट, ही स्तुती तुझ्या चेह~याची
तन्मयतेची..
तुझ्या बंद डोळ्यांची.
तुझ्या सारखी कविता समोर असताना
गरज काय
दुसरं काही कळायची?"
.
.
तुषार जोशी, नागपूर

एक कविता करता येईल

.

तुझ्या सुरेख दिसण्यावर
एक कविता करता येईल
तुझ्या मोहक हसण्यावर
एक कविता करता येईल

खळी भरल्या गालावर
एक कविता करता येईल
तुझ्या श्वासांच्या तालावर
एक कविता करता येईल

सावळ्या तुझ्या रंगावर
एक कविता करता येईल
तुझ्या सहज ढंगावर
एक कविता करता येईल

तुझ्या ओठातल्या गाण्यावर
एक कविता करता येईल
तुझ्या डोळ्यातल्या पाण्यावर
एक कविता करता येईल

तुझ्या रोखून बघण्यावर
एक कविता करता येईल
क्षणात ठोका चुकण्यावर
एक कविता करता येईल

तुला सगळे कळण्यावर
एक कविता करता येईल
तुझ्या बेमालूम लपवण्यावर
एक कविता करता येईल

तुझ्या उगाच वगळण्यावर
एक कविता करता येईल
वळून मला छळण्यावर
एक कविता करता येईल

तू असताना असण्यावर
एक कविता करता येईल
तू नसताना नसण्यावर
एक कविता करता येईल

तुषार जोशी, नागपूर
२० सप्टेंबर २०१०, २१:००

तू इथेच आहेस

.
.
तू इथेच आहेस
मी पोपटी शर्ट घेऊन
आरशासमोर आलो
की आरशात दिसतेस
नाक मुरडत चेहरा हलवतेस
मग मी निमुट पणे
तुझा आवडता
पांढरा शर्ट घेऊन येतो
आरशात आता
कौतुकाने भरलेला
तुझा हसरा चेहरा पाहतो
.
तू इथेच आहेस
जेवणाचा कंटाळा केला
की डोक्यावर टपली देतेस
तू माझा ना
मग असं नाही करायच
हळुच कानात पुटपुटतेस
मी निमुटपणे
स्वयंपाक करतो आणि
हसत हसत खातो
.
तू इथेच आहेस
झोपताना तुझ्या
असण्याचा सुगंध
मंद पणे दरवळतो
सतत जाणवतो तुझा हात
केसांवरून
गुपचुप तुझी
एक ओढणी आणली आहे
मी बॅगेत भरून
.
.
तुषार जोशी, नागपूर
(०७ मार्च २००९ / टेरीटाऊन)

तू बोलतेस ना

.
.
तू बोलतेस ना
तेव्हा मन बोलतेस
गोड गोड उत्कटतेचे
क्षण बोलतेस
.
मी ऐकतो
मोहरतो
भान विसरतो
तुला ऐकणे माझ्यासाठी
सोहळा ठरतो
.
तू बोलतेस ना
तेव्हा तेव्हा वेळ थांबते
सगळे आयुष्य काही वेळ
विसरायला होते
.
मी ऐकतो
बहरतो
नवा होतो
त्या क्षणांचे
आनंदकण
वेचून घेतो
.
तू बोलतेस ना
पोचतेस तेव्हा शब्दाशब्दातून
आर्त संगीत ऐकू येते
खोल हृदयातून
.
मी ऐकतो
मी जपतो
जतन करतो
तुला ऐकणे माझ्यासाठी
सोहळा ठरतो
.
.
तुषार जोशी, नागपूर
(०७ मार्च २००९/टेरीटाऊन)
.

मठ्ठ आहेस रे

.

.

तू मठ्ठ आहेस रे

असं म्हणायचीस

जीव जडलेला असल्याने

ते पण गोड वाटायचे

.

मग आम्ही तुझ्यासमोर

नवे नवे उद्योग करून

ते पुन्हा ऐकण्यासाठी

मठ्ठ वागून दाखवायचे

.

किती वर्षे झाली गं

खळखळून हसलो नाही

एकदा तू मठ्ठ आहेस

इतके म्हणायला तरी ये

.

तुषार जोशी, नागपूर

तू

.

.

तू

एकांतात

गालातल्या गालात

हसण्याचे कारण

तू

.

तू

गुरगुट्टा भात

भरपूर तुपात

अन साधं वरण

तू

.

तू

पावलो पावली

तुझीच सावली

सुगंधी स्मरण

तू

.

तुषार जोशी, नागपूर

११ आक्टोबर २००८

तुला पहिल्यांदा पाहिले ना

.

.

तुला पहिल्यांदा पाहिले ना

तेव्हाच कळले तू म्हणजे

जादूगार,खळखळणारे हसू पसरवणारी

.

तुला भेटत गेलो नंतर 

तेव्हा कळले तू ज्योत आहेस

उदासिनतेच्या अंधाराचा नाश करणारी

.

तुला समजत गेलो आणि

तेव्हा कळले तू नुसते असणे

म्हणजेच प्रसन्नता आयुष्य खुलवणारी

.

तुषार जोशी, नागपूर

.