पणती

अंधार वाढेल
दिशांना व्यापेल
भासेल चहूकडे
काहीच दिसत नाही
वाटत असले तरीही
पणती - आशेची तेवत ठेवा

प्रयत्न थकतील
अंदाज चुकतील
हवे तसे ना घडे
सर्व उपाय संपलेत
वाटत असले तरीही
पणती - जिद्दीची तेवत ठेवा

एकटे वाटेल
शांतता जाचेल
डोळ्यात साचे रडे
आपले नाहीच कुणी
वाटत असले तरीही
पणती - प्रीतीची तेवत ठेवा

~ तुष्की
नागपूर, ५ मे २०१३, १२:००

उड जा पुढे

धमन्यातून सळसळ रक्त नवे
चैतन्यच अंकुरले हिरवे
अंधार कधीचा फिटला हो
ध्येयाचा चेहरा दिसला हो
भिड जा पुढे
भिड तू रे गड्या
उड जा पुढे
उड तू रे गड्या

आला जर पर्वत तर त्याला
शक्ती आहे सर करण्याची
वर चढण्याची युक्ती लावू
अथवा त्याला पोखरण्याची
भय कसले संशय कुठला हो
निश्चय जाहिर सांगितला हो
चढ जा पुढे
चढ तू रे गड्या
उड जा पुढे
उड तू रे गड्या

करकचून ताणू जिद्दीला
दणदणून सोडू जगताला
चंद्राची माथ्यावर बिंदी
केसातुन माळू सूर्याला
प्रयत्नाचा गुण पटला हो
अंगात यशोज्वर ऊठला हो
लढ जा पुढे
लढ तू रे गड्या
उड जा पुढे
उड तू रे गड्या

तुषार जोशी, नागपूर

जिद्द

जिंकण्याची जिद्द आहे हारलो आधी जरी,
ध्यास नाही सोडला
मी प्रयत्नांचा सरावाचा सुकाणू घेऊनी
मार्ग माझा शोधला

एकटा झालो तरीही दुःख ना केले कधी
एकट्यांना शोधले
हासण्याचा मंत्र त्यांना देऊनी आलो किती
मित्र सच्चे लाभले

वाटले आकाश, जेथे कोंडलेली पाहिली
कोवळी स्वप्ने किती
ज्या क्षणी झाली तयारी झेप घेण्याची नभी
लाभल्या साऱ्या मिती

जे मिळाले तेच घेवोनी पुढे चालायचे
जाणले मी नेहमी
जे मिळाले ना मला हव्यास त्याचा सोडला
तृप्त 'तुष्की' आज मी

~ तुष्की (+९१ ९८२२२ २०३६५)

नागपूर
०१ मे २०१२, १९:१५