बुधवार, १६ एप्रिल, २०१४

काटा रूतलाय खोल

काटा रूतलाय खोल
जरी मागितला नाही
काटा रूतलाय जरी
माझा काही दोष नाही

काटा रूतलाय खोल
चालणेच झाला दोष
मला भुलावत होते
पाना फुलांचे आमिष

काटा रूतलाय खोल
वाटे निघू नये आता
आत राहूनही त्रास
जीव जाईल निघता

काटा रूतलाय खोल
म्हणूनच मी जागतो
माझ्या मागून येणाऱ्या
साठी फुले मी मांडतो

काटा रूतलाय खोल
कदाचित याच साठी
वेदनेतून फुलावी
अमृताची गाणी ओठी

~ तुष्की,
वाशिंग्टन, १६ एप्रिल २०१४, ०४:००

कोणत्याही टिप्पण्‍या नाहीत:

टिप्पणी पोस्ट करा

ही कविता वाचून तुम्हाला कसे वाटले? पटली का? काही जुने अनुभव ताजे झाले का? आवडली का? तुम्हाला पण काही लिहावेसे वाटले का? इथे तुमचा अभिप्राय लिहून जा: