गुरुवार, १९ ऑक्टोबर, २०१७

कितीदा सांगतो

मनाने मी तुझा होतो तुझ्या लक्षात आले ना
तुझे होते जरी सारे तुला तेव्हा मिळाले ना
.
तुला भेटायचे होते तुला सांगायचे होते
किती ते व्हायचे होते तरी काहीच झाले ना
.
मनाला मी कितीदा सांगतो जाऊ पुढे आता
तुला मन भेटले होते तिथुन काही निघाले ना
.
सकाळी हाकले ते आठवांचे गोजिरे पिल्लू
अता त्याच्या विना माझ्या मनाचे पान हाले ना
.
कितीदा फोन झाले पण तुझ्या स्पर्षामधे जादू
हृदय हट्टी असे त्याला तुझा आवाज चाले ना
.
तुष्की नागपुरी
नागपूर, २५ जुलै २०१७, २०:००
(कविता रसिक मंडळींचा दीपावली गझल विशेषांक २०१७)